Félagslegir þættir

Fjölbreytileiki og jafnrétti skiptir okkur miklu máli og höfum við sett okkur skýra stefnu í jafnréttismálum sem nær til alls starfsfólks.

Stefnan sem byggir á lögum nr. 150/2020 um jafna stöðu og jafnan rétt kynjanna miðar að því að stuðla að jafnri stöðu starfsfólks innan fyrirtækisins og jöfnum tækifærum einstaklinga á sem flestum sviðum. Einnig miðar stefnan að því að starfsfólki sé ekki mismunað vegna uppruna, þjóðernis, stéttar, tungumáls, litarháttar, trúarbragða, skoðana, kyns, kynhneigðar, kynvitundar, aldurs, fötlunar, líkamsgerðar eða annarrar stöðu. Við trúum því að í fjölbreytileikanum liggi tækifæri.

Atvinna með stuðningi

Húsasmiðjan leggur sitt af mörkum við að styðja við þá sem hafa skerta starfsgetu vegna andlegrar og/eða líkamlegrar fötlunar með því að finna þeim starf við hæfi innan Húsasmiðjunnar og er það gert í samvinnu við Vinnumálastofnun. Við teljum þetta vera þroskandi verkefni fyrir alla hlutaðeigandi. Árið 2022 voru 8 einstaklingar með skerta starfsgetu í starfi hjá Húsasmiðjunni.

Kynjahlutfall

Stöðugt er unnið að því að jafna kynjahlutfall starfsfólks, bæði í stjórnunarstöðum og í heild. Hlutfall kvenna í heild sinni minnkaði örlítið árið 2022 og var 28%. En hafði fram að því verið að hækka frá árinu 2018 þegar hlutfall kvenna var 24%. En hlutfall kvenna í framkvæmdastjórn jókst á
síðasta ári frá 12,5 % í 25%. Við setjum okkur markmið um að halda áfram að jafna kynjahlutfallið, bæði í stjórnunarstöðum og í heild.

Húsasmiðjuskólinn

Við teljum að menntun og þekking sé ein af mikilvægustu forsendum þess að starfsfólki líði vel í starfi. Það er nauðsynlegt að viðhalda hæfni og færni með sífelldri endurnýjun á þekkingu. Því er lögð rík áhersla á að efla og þróa faglega og persónulega hæfni og þekkingu starfsfólks. Í Húsasmiðjuskólanum sem hefur verið starfræktur síðan 1998, er boðið upp á fjölda námskeiða og fræðslufunda á hverju ári, en stærstur hluti þeirra er kenndur af öðrum starfsmönnum Húsasmiðjunnar, bæði í staðarnámi sem og á rafrænu formi. Þannig miðlum við sérþekkingu og heildin dafnar.

Fræðslan er fjölbreytt og er starfsmönnum skylt að sækja ákveðin námskeið starfs síns vegna en einnig er boðið upp á valnámskeið sem ýmist snúa að því að efla okkur bæði faglega og persónulega. Húsasmiðjan styður einnig við starfsfólk sem sækir sér frekari menntun á framhalds- eða háskólastigi.

Stuðst er við fjórar megin áherslur fræðslu;

• Vörur/umhverfi
• Þjónusta
• Tækni/kerfi
• Samskipti/leiðtogafærni. 

Námsframboð og -aðsókn eykst með hverju árinu. Vandað og aukið fræðsluframboð, hvatning frá stjórnendum, aukin lærdómsmenning og markvisst fræðslustarf teljum við að skýri aukna aðsókn í nám.

Starfsþróun

Fjöldi starfsfólks hefur unnið hjá fyrirtækinu í langan tíma, unnið við hin ýmsu störf og býr þar af leiðandi yfir gríðarlega góðri þekkingu sem er dýrmætt fyrir samstarfsfólk og fyrirtækið. Störfin eru fjölbreytt og tækifæri til starfsþróunar víða. Hægt er að fara ýmsar leiðir til að þróast í starfi, t.d. axla meiri ábyrgð í eigin starfi, færast til í starfi innan starfsstöðvar eða á milli starfsstöðva ásamt því að færast í hærri stöður. 

Anna Bragadóttir hóf störf hjá Húsasmiðjunni fyrir 20 árum eða þegar hún var 18 ára gömul. Hún byrjaði að vinna á afgreiðslukassa í verslun okkar í Skútuvogi, síðar tók hún við þjónustuborðinu og stuttu seinna tók hún einnig við bókhaldi og uppgjöri fyrir verslunina. Í kjölfarið tók hún svo við sem deildarstjóri þjónustuborðs og afgreiðslukassa. Árið 2015 tók hún svo þátt í innleiðingu á nýju tölvukerfi fyrir Húsasmiðjuna. Eftir að því lauk var henni boðin staða á skrifstofu í bókhaldsdeild. Í dag er hún orðin hluti að mannauðsdeild og sér um fræðslumál ásamt fleiri verkefnum. 

Hvað er best við að starfa í Húsasmiðjunni og hvaða ráð gefur þú þeim sem vilja þróast í starfi?  “Það eru mörg og fjölbreytt störf í Húsasmiðjunni og næg tækifæri fyrir þá sem hafa áhuga á að vaxa í starfi og takast á við ný verkefni og þannig sífellt að bæta við þekkingu og læra nýja hluti”.

Öryggismál

Öryggi starfsfólks skiptir gríðarlegu máli og við leggjum mikið upp úr því að búa til og viðhalda öruggu starfsumhverfi. Hjá Húsasmiðjunni er starfrækt öryggisnefnd sem vinnur með mál er varðar aðbúnað, hollustuhætti og öryggi. Á starfsstöðvum okkar eru öryggistrúnaðarmenn sem kosnir eru af starfsfólki og/eða öryggisverðir sem er stjórnandi á starfsstöð. Árið 2022 lauk vinnu við að yfirfara alla verkferla, öryggismöppur og áhættumöt fyrir öll störf hjá fyrirtækinu á öllum okkar starfsstöðvum með það að markmiði að tryggja betur starfsöryggi starfsfólk og draga enn meira úr hættu á slysum. Haldin voru námskeið fyrir öryggistrúnaðarmenn ásamt því að skyndihjálparnámskeið, netöryggisnámskeið og almenn öryggisnámskeið voru haldin fyrir starfsfólk. Auk þess var haldin öryggisvika sem tileinkuð var öryggismálum. Fjárfest var í hjartastuðtækjum og þau sett upp í stærstu verslunum okkar.

Vinnuslysum hefur fækkað hjá okkur síðustu árin. Árið 2022 var heildarfjöldi áverka og banaslysa sem hlutfall af heildarfjölda starfsmanna 1,3% en var 2,3% árið 2019. Veikindahlutfall jókst örlítið milli ára, var 6,4% árið 2022 samanborið við 4,6% árið 2021. 

Einelti, áreitni og ofbeldi ekki liðið

Húsasmiðjan er með skýra stefnu og viðbragðsáætlun í málum er varða einelti, áreiti og ofbeldi á vinnustað. 

Við viljum að allir viti að slík mál eru ekki liðin hjá okkur, forvarnir eins og fræðsla um samskipti og eðlilega hegðun er reglulega á dagskrá hjá okkur. Viðbragðsáætlun er aðgengileg í gæðahandbók og á innri vef fyrirtækisins, áætlunin er einnig kynnt fyrir öllum nýju starfsfólki þegar það hefur störf ásamt því að áætlunin er kynnt árlega samhliða kynningum á niðurstöðum úr vinnustaðagreiningu. Markmið okkar eru að allt starfsfólk þekki stefnu og viðbragðsáælun okkar er varða einelti og áreiti.